Në Universitetin “Kadri Zeka” u mbajtën provimet pranuese

Në të gjitha fakultete e Universitetit  “Kadri Zeka”  në Gjilan u mbajtën provimet pranuese për pranimin e studentëve të rinj për vitin akademik 2016/2017. Për të parë nga afër këtë proces, Bajram Kosumi Rektor në Universitetin “Kadri Zeka”, së bashku me Prorektorët dhe Sekretarin e Përgjithshëm,  kanë vizituar disa nga sallat ku janë mbajtur provimet pranuese, derisa  janë shprehur të kënaqur me mënyrën e organizimit dhe mbarëvajtjen e ecurisë  së testit pranues të studentëve të rinj të cilën dëshirojnë të jenë pjesë e Universitetit tonë. Rektori Bajram Kosumi,  të gjithë kandidatëve u uroi suksese në provimin pranues. Kurse Shpresë Qamili, Prorektore për Mësim, Kërkime Shkencore dhe Çështje të Studentëve, tha se procesi i testimit ka shkuar mbarë dhe se nuk ka pasur ndonjë parregullsi. Universiteti  “Kadri Zeka” ne Gjilan, në katër Fakultetet, atë të Edukimit, Juridikut, Ekonomikut dhe Fakultetin e Shkencave Kompjuterike, në  vitin e parë të studimeve, për vitin akademik 2016-2017, do të regjistrojë 1504 studentë të rregullt,  në kuadër të këtij numri përfshihen edhe studentët e Luginës së Preshevës dhe të komunitetit pakicë.

Ndërkohë, në Universitetin e Gjilanit “Kadri Zeka” rezultatet e  provimit pranuese do të shpallen deri më datë  26 korrik 2016 në fakultetet përkatëse, si dhe në ueb faqen e Universitetit uni-gjilan.net . Gjithashtu, është paraparë edhe periudha e ankimit, kandidatët që refuzohen mund t’i paraqesin ankesë Komisionit për ankesa, 48 orë pas shpalljes së rezultateve. Pas këtij afati ankesat nuk do të pranohen.